ប្រធានមន្ទីរហិរញ្ញវត្ថុខេត្តកណ្ដាល ឈ្មោះ អ៊ិន យ៉ុម ដែលជាអ្នកវិនិយោគផ្សារតាខ្មៅ គិតតែរឿងផលប្រយោជន៍ផ្ទាល់ខ្លួន
22-July-2016 | ដោយ មែន កំសត់
ប្រភពពីអាជីវករលក់ដូរនៅផ្សារតាខ្មៅ បានឲ្យដឹងថាប្រធានផ្សារឈ្មោះ អ៊ិន យ៉ុម ដែលជាប្រធានមន្ទីរសេដ្ឋកិច្ច និងហិរញ្ញវត្ថុផងនោះ កំពុងធ្វើអ្វីៗតាមអំពើចិត្តដើម្បីប្រមូលលុយយកទៅធ្វើមានធ្វើបាន ផ្ទាល់ខ្លួន ហើយមិនគិតពីការកែលម្អផ្សារនោះទេ។ បញ្ហានេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គួរពិនិត្យមើលខ្លះផង ព្រោះឈ្មោះ អ៊ិន យ៉ុម កំពុងកេងប្រវ័ញ្ចលើអាជីវករសព្វបែបយ៉ាង ហើយការទារភាស៊ីឬថ្លៃផ្ញើកង់ម៉ូតូជាដើម មិនអនុវត្តន៍ឲ្យបានត្រឹមត្រូវតាមសៀវភៅបន្ទុកនោះទេ។ ជាពិសេសនៅពេលផ្សារតាខ្មៅមានភក់ជ្រាំស្អុយគគ្រុក គឺឈ្មោះ អ៊ិន យ៉ុម មិនចាត់វិធានការដោះស្រាយឲ្យបានទាន់ពេលវេលាឡើយ ចំណែកថ្លៃទឹកថ្លៃភ្លើងក៏មានកម្រិតខ្ពស់ផងដែរ។
តាមការអះអាងរបស់អាជីវករជាច្រើនរូបបានឲ្យដឹងថាឈ្មោះ អ៊ិន យ៉ុមអ្នកវិនិយោគផ្សារតាខ្មៅ គិតតែពីការកេងប្រវ័ញ្ចលើអាជីវករ ហើយមិនបានយកចិត្តទុកដាក់អភិវឌ្ឍន៍ផ្សារ គោរពតាមសៀវភៅបន្ទុកក្នុងការទារភាស៊ី និងកេងប្រវ័ញ្ចទៅលើថ្លៃទឹកថ្លៃភ្លើងគ្រប់រូបភាពទាំងអស់។ ប្រភពបានឲ្យដឹងទៀតថា ជារៀងរាលថ្ងៃអាទិត្យក្នុងផ្សារតាខ្មៅតែងតែដាច់ភ្លើង ប៉ុន្តែគីឡូភ្លើងមិនចេះថយឡើយ សូម្បីតែអាជីវករខ្លះបិទតូប៥ថ្ងៃក៏ថ្លៃភ្លើងនៅតែដដែលគ្មាន ការថយចុះនោះទេ។ ក្នុង១តូបសូម្បីតែប្រើអំពើពូល១ក៏ត្រូវចំណាយក្នុងមួយខែពី៣ទៅ ៤ម៉ឺនរៀលដែរ ព្រោះក្នុង១គីឡូវ៉ាត់១៦០០រៀល។ ចំណែកទឹកវិញក្នុង១ម៉ែត្រគូបតម្លៃ៣០០០រៀល ដែលបញ្ហានេះបញ្ជាក់ថាអ្នកវិនិយោគផ្សារតាខ្មៅឬប្រធានផ្សារ កំពុងកេងប្រវ័ញ្ចសព្វបែបយ៉ាងក្នុងខណៈដែលបញ្ហាសណ្ដាប់ធ្នាប់កាន់តែ អាក្រក់ទៅៗ។
ដោយសារប្រឈមនឹងការកេងប្រវ័ញ្ចហួសហេតុពេកទើបអាជីវករផ្សារតាខ្មៅ អំពាវនាវឲ្យលោក ម៉ៅ ភិរុណ អភិបាលខេត្តកណ្ដាល ពិនិត្យបញ្ហាដែលកើតឡើងក្នុងផ្សារតាខ្មៅខ្លះផង ព្រោះប្រធានផ្សារឈ្មោះ អ៊ិន យ៉ុម ដែលជាប្រធានមន្ទីរហិរញ្ញវត្ថុខេត្តផងនោះ កំពុងគាបសង្កត់អាជីវករហួសហេតុពេក។ លើសនេះទៅទៀតបញ្ហាសណ្ដាប់ធ្នាប់ អនាម័យ បរិស្ថាន និងការកកស្ទះចរាចរណ៍ ក៏ដូចជាភាពអនាធិបត្យេនៃការចតរថយន្ត និងម៉ូតូគ្មានសណ្ដាប់ធ្នាប់ក៏ជារឿងដែលអាជ្ញាធរក្រុងតាខ្មៅ និងអាជ្ញាធរខេត្តកណ្ដាល គួរពិនិត្យឡើងវិញនិងចាត់វិធានការដោះស្រាយប្រកបដោយប្រសិទ្ធភាព។ ជាងនេះទៅទៀតលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនត្រូវបណ្ដែតបណ្ដោយឲ្យឈ្មោះ អ៊ិន យ៉ុម ធ្វើអ្វីៗតាមអំពើចិត្តទេ ព្រោះប្រភពខ្លះបង្ហើបឲ្យដឹងថាការវិនិយោគផ្សារតាខ្មៅ គ្មានការដេញថ្លៃប្រកបដោយតម្លាភាពឡើយ គឺឈ្មោះ អ៊ិន យ៉ុម ទទួលបានសិទ្ធិដោយមានភាពមិនប្រក្រតីនិងធ្វើអ្វីៗតាមអំពើចិត្ត របស់ខ្លួន៕
ចំនួនអ្នកទស្សនា
- ថ្ងៃនេះ4181
- ម្សិលមិញ4891
- សប្តាហ៍នេះ20091
- ខែនេះ24931
- ឆ្នាំនេះ809561
- សរុប21252017